Budak leutik ngalahun budak, diuk sisi jalan ngadon nadahkeun leungeun, jajaluk.
Budak leutik buukna ririaban katiup angin sore nu mawa kekebul motor.
Budak ngagoak ngarasakeun kekebul asup kana matana.
Leungeunna nu kuleuheu gancang gigisik, lain cageur kalah beuki peureus karasana.
Kabuktian goakna tambah tarik wae.
Budak leutik teuing ku sabar, budak dibalikkeun lahunannana sina naplok na dadana.
Angger bari diuk ngadeprok sisi jalan na aspal garing.
Lalaunan budak diusapan tonggongna bari ngahariring.
Teuing hariring teuing harewos.
Nu jelas budak rerep ceurikna.
Basa beungeutna nyanghareup deui ka jalan.
Budak matana jeer beureum jojorelatan kawas silalatu
Pating suliwer antara cimata jeung kekebul jalan
Mancawura teu kawawa
Tingsereset tingseredet
Na kamana indung bapana?
Na kamana dulur-dulurna?
Na kamana tatanggana?
Na kamana urang?
Tidak ada komentar:
Posting Komentar