Donor darah, naon nya basa sundana? Nyumbang getih? Donor getih? Ah ..... asa ningnang. Tapi sadayana ge pasti terang naon maksudna donor darah. Nyumbangkeun salahsahiji milik nu aya dina badan nyatana getih keur kapentingan jalma nu merlukeun getih. Loba pisan jalma nu perlu getih diantarana ; nu rek operasi tur merlukeun getih keur transfusi, sabada ngalahirkeun kurang getih perlu donor. Insya Allah donor darah kaasup amal nu hade sarta mugia mangpaat dunya aherat. Asal ikhlas jeung teu ngaharepkeun wawales. Ke jaga di aherat digantian ku Allah SWT ku ganti nu panghade-hadena. Insya Allah.
Ari donor darah teh kaasup salahsahiji kagiatan sosial nu hartina mangpaat hadena bisa dirasakeun langsung ku jalma jeung sabudeureun lingkungannana. Utamana ku jalma-jalma nu merlukeun getih. Euweuh ti dituna nu donor darah menta digantian ku barang-barang ataea duit. Mun pareng aya kadaharan nu disadiakeun lain hartina nukeuran getih. Eta mah salahsahiji cara ngedalkeun rasa syukur ku kersana nyumbangkeun getih kanggo kapentingan sarerea. Atuh mun pareng mangsana perlu getih ulah teuing ngarasula upama aya duit nu kudu dikaluarkeun lantaran ngarumat getih teh teu bisa sagawayah.
Kuring pernah oge donor darah jadi bisa nyebutkeun naon-naon bae barang nu memang saperluna kudu aya gantina. Contona kertas jarum suntik tempat getih es batu lomari es tempat nyimpen getih. Satutasna getih dikumpulkeun teh teu bisa langsung kitu wae dipake. Aya usaha ngecek sehat henteuna getih di laboratorium. Tah eta kabeh merlukeun duit. Omat ulah disalahhartikeun ulah dianggap salah hal ieu teh sabab mun perlu getih memang perlu duit keur ngagantian biaya administrasi nu dikaluarkeun ku instansi nu nguruskeun getih.
Yakin kuring mah nu donor darah baris ngarasa kuciwa pisan sakuciwa-kuciwana mun aya nu ngomong yen getih nu disumbangkeun ditukeuran ku bubur kacang hejo atawa susu panas. Teu pisan-pisan. Niat hade mah ulah dicoretan ku omongan goreng. Keun wae lah Allah SWT nu baris malesna. Mun pareng perlu getih boh keur diri sorangan atawa dulur atawa babaturan ulah nepi ka kaluar kecap nu matak ngajaheutkeun manah donor darah utamana mah dina jero ati nu pangjerona. Ari ucapan mah biasana kalepasan, teu nanaon, dihampura. Dina mangsan narima getih, ulah hilap ngucap syukur alhamdulillah ka Allah SWT terus mun bisa mah do'akeun jalma nu geus mantuan urang ku jalan donor darah. Ulah ieu mah kena-kena hese beleke meunangkeun getih bari ngaluarkeun duit sok kalah ngarasula ngumpat ngahina sataker kebek. Beu edas kawas getih bisa diproduksi masal wae model oli atawa bengsin.
Getih teh memang sumber kahirupan. Naon sababna? Mun manusa euweuh getihan bisa jadi masih hirup bisa jadi oge geus maot. Tapi nu pasti jalma euweuh getihan mah garing kawas kararas. Kulantaran getih teh perlu pisan, pantes mun nu donor darah sok diganjar ku penghargaan : aya penghargaan nyumbang 10 x, 75x. Ieu oge omat ulah dianggap ngagantian getih ku piagam. Euweuh ti ajalina mun dianggap kitu teh. Kacida teu ridona nu donor darah mun dianggap getih nu disumbangkeun ditukeuran ku piagam.
Donor darah teh lantaran hayang nyumbang keur kahadean ku sumbangan nu panghade-hadena. Insya Allah getih nu disumbangkeun bakal mawa mangpaat. Sok bae emutkeun, coba bayankeun, kumaha bungahna jalma nu boga dulur butuh getih tur mun teu aya getih baris meunangkeun bahaya nu ngancam jiwana. Pernah ngalaman kajadian kitu?
Tangtu aya nu pernah aya nu teu acan pernah. Ari kuring mah pernah sababaraha kali ; lahiran anak 3 an pasti perlu getih, adi tabrakan nepi ka operasi perlu getih nu loba.
Alhamdulillah, hatur nuhun ka anu tos donor darah. Mugia amal ibadahna ditampi Allah SWT sareng kenging ganjaran nu langkung sae.
Tidak ada komentar:
Posting Komentar