Ngaji Diri

Ngaji diri teh nyaeta ngiker-ngiker ngukur-ngukur sagala rupa hal nu dilakukeun ku diri pribadi dina raraga nyanghareupan hirup jeung kahirupan di alam dunya ieu, naha geus salaras jeung papagon agama atawa henteu. Aya oge nu kudu disalaraskeun jeung papagon darigama. Tah didinya perluna elmu ngaji diri teh supaya bisa ngabedakeun mana nu hade jeung mana nu goreng. Tapi tetep patokan nu leuwih utamana mah ngan saukurpapagon agama. Dina hal ieu Islam.
Teu aya deui. Cenah kudu tumut kana pituah para pamingpin? Teu salawasna sagala parentah pamingpin kudu dilaksanakeun, kudu bisa milah milihna. Mun teu sapagodos jeung papagon agama mah tong ngarasa sieun, tinggalkeun wae ulah dijalankeun. Atuh eta masalah aya resikona, pasti ngaranna ngalawan mah aya akibatna. Tapi omat, ulah sieun ku hukuman ti jalma, nu penting ajeg bener ceuk agama pangutamana mah. Inget, nu kudu dipikasieun mah hukuman engke di aherat nu abadi nu sateterusna jeung moal aya eureunna.

Ari gunana ngaji diri teh nyaeta supaya bisa ngaragap rasa nu dirandapan ku batur. Engkena baris timbul rasa ngahargaan kana naon bae hal ; rek leutik rek gede nu ku urang dilakukeun. Kudu bisa kalayan bener ngabalitungkeun naon bae risiko nu baris aya mun urang ngalakukeun salah sahiji hal. Risiko eta teh keunana ka saha bae ; diri sorangan, tatangga, babaturan, kulawarga. Kabeh kudu dipikirkeun lantaran manusa mah kasebutna ge leutik ringkang gede bugang. Maksudna kieu, sagala rupa kalakuan urang sakumaha leutikna ge sakumaha teu pentingna ge tetep aya akibatna, akibat hade atawa akibat goreng. Satincak saparipolah urang pasti aya akibatna.

Inget teu lalakon Ariel ? Kade hal eta teh kudu diperhatikeun, kudu bisa ditarik saripatina, kudu bisa narik bahan lenyepaneunnana, lain hayoh kalahka nongton videona, diimeutan keur dipraktekkeun lantaran dicontoan artis nu keur meujeuhna moyan. Kudu bisa jadi bahan pikeun ngaji diri yen mun boga kalakuan minculak teh, ulah salah,  hiji mangsa mah pasti baris kanyahoan. Najan sakumaha rapihna nyimpen rusiah baris kaboker. Najan sakumaha parimpenna nyimpen kagorengan moal lepat deui pasti katingali kalawan jelas atra tur tetela. Teu ayeuna jaga mun geus paraeh baris ditempokeun deui. Sapuratina salengkepna, luyu jeung kajadian nu sabenerna. Percaya heug teu wae kajeun lah, ngabejaan wungkul. Mangkana, tobat Jang ti ayeuna geura tobat supaya dosana leungit tanpa lebih ilang tanpa karana. Mun geus dihampura eta ge .......