Timus atawa katimus, salahsahiji kadaharan olahan tina bahan sampeu. Biasana dijadikeun kadaharan selingan sarupaning panyelang mangsa istirahat saacan dahar saenyana. Ngadaharna bisa dibarengan bari sakalian nyuruput kopi atawa teh. Bisa oge didahar peuting-peuting mangsa tiis datang tapi kudu dibaturan ku cai jahe nu haneut.
Cara nyieunna gampang pisan tinggal sadiakeun bahan-bahanna ; sampeu meunang marud, kalapa meunang marud sacukupna, gula beureum meunang ngurud sakaresepna. Keur mungkusna nu wajar mah make daun cau nu geus dileumpeuhan ngarah gampang ngatur bungkusna. Tong hilap ceumat tina nyere kalapa atawa nyere kawung, mun teu aya bisa make kai paranti nyeuhil jigong hi hi hi ......atawa korek api tina bahan kai nu geus diseuseukeutan heula ngarah gampang nyeumatkeunnana.
Geus siap sakabeh bahanna laju disiapkeun daun cau nu tos dileumpeuhan dieusian sampeu meunang marud nu geus dicampur jeung kalapa meunang marud oge, diemple-emple diratakeun terus ditambahan gula beureum sacukupna tutup tah diratakeun si adonan sampeu teh. Dibungkus dibuleudkeun model nyieun lontong, sisi-sisina diraketkeun make ceumat nu geus disiapkeun.
Diasakannana ku cara diseupan make langseng. Mun di lembur mah bisa make seeng oge.
Hasilna saperti dihandap ieu ;
Dina gambar ieu kuring make bahan sampeu koneng pamere ti nu sok ngumpulkeun runtah di imah, Bang No ngaranna teh, loba pisan merena, cenah nugar tina kebon anjeunna. Campur kalapa ngora parud jeung sesa gula kawung bawa ti lembur lebaran kamari. Rasana memang beda teu kawas gula beureum nu aya di toko-toko di Tangerang, sok rada pait. Nyieunna teu sabaraha lila tapi meakeun ngadaharna nu lila teh lantaran teu sakabeh kulawarga ngasaan. Ongkoh sigana kalobaan teuing nyieun katimus soalna sanajan geus dibagikeun ka tatangga ge di imah poe katilu masih aya keneh 4 siki deui disimpen dina kulkas. Kapaksa dibeakkeun ku sorangan.
Tidak ada komentar:
Posting Komentar