Konsep Portal dan Manajemen Konten

Mangsa ayeuna keur meumeujeuhna tumuwuh social media. Ngarekahannana ngabelesat pisan, langsung mumbul ka jomantara ngahasilkeun hal nu matak dipikaheran. Hampir sakabeh jalma ngabogaan akun dina facebook, twitter, pinterest, youtube, instagram jeung rea-rea deui social media.  Blog nyakitu keneh geus pada ngabogaan malahan aya nu ngokolakeun blog leuwih ti hiji. Di sababaraha pausahaan aya nu ngawajibkeun para pagawena kudu ngabogaan blog pikeun nyaritakeun pagawean nu dilakonan atawa naon bae hal nu aya hubungannana jeung kagiatan pausahaan. Tangtu wae eusina teu meunang nyaritakeun kagorengan pausahaan dina harti wayahna kudu nyaritakeun hal-hal positif ngeunaan pausahaannana.

Kangaranan manusa salaku makhluk sosial lumrahna pasti hayang leuwih maju dina sagala segi kahirupan. Nyakitu deui dina ngokolakeun social media aya mangsa dimana manusa ngarasa keneh asa loba kurangna utamina dina masalah timbal balik komunikasi (interactive communication). Kahayangna komunikasi bisa dilakukeun kalayan leuwih hirup, leuwih nyata sok sanajan saenyana ngan saukur dina alam internet (cenah mah geus lain alam maya deui ayeuna mah sesebutanna teh, lantaran matak beda persepsi, duka ku naon sababna).

Numutkeun sajarah, ti mimiti ayana obrolan nu diketik make kudu telepon heula ka operator nu  saterusna dihubungkeun kaluar pesen ketikannana make pager nepi ka aya modem nu nyababkeun antara sasama bisa ngobrol ku jalan ngetik dina papan ketik. Ningkat deui nepi ka bisa silih kirim data terus bisa silih kirim video atawa bisa langsung silih ngobrol bari silih teuteup model dina video konferensi. Eta teh kamajuan anu terus-terusan diulik supaya nu tadina ngan saukur sawangan atawa impian ahirna bisa jadi kanyataan.

Eta kabeh aya mangsa-mangsa pasang surutna jeung ngaliwatan waktu nu lumayan panjang oge. Memang, dina waktuna model komunikasi teh baris kalindih ku model komunikasi anyar anu sakirana bisa ngunggulan kana model nu geus aya jeung tangtuna nyumponan kana kahayang manusa anu ngagunakeunnana. Lumrah jeung geus ngarupakeun hukum alam.

Kumaha atuh kira-kirana dina mangsa nu bakal disanghareupeun ku urang? Naha masih keneh facebook, twitter jeung model social media sejenna digunakeun ku manusa? Cenah mah bisa jadi eta fasiltas social media masih digunakeun ku manusa lantaran hal eta ngarupakeun salah sahiji kabutuhan, ngan kahareup mah baris maju deui model komunikasina. Unggal manusa baris ngabogaan televisi sorangan nu kira-kira sarua cara jeung model ngagunakeunnana jeung manusa jaman ayeuna nu ngabogaan akun social media masing-masing.

Tah...... kamungkinan eta tos katingali ti ayeuna ku mimiti sumebarna televisi-televisi lokal di unggal provinsi. Mun baheula mah sacara nasional ngan saukur aya TVRI, saterusna mimiti aya tambahan RCTI, TPI, SCTV jeung lian-lianna ngan masih dina skala nasional. Kadieunakeun beuki loba televisi lokal saperti CTV Banten, TV Cianjur, Batam TV, Galuh TV, jeung rea-rea deui. Televisi lokal loba nu resepeun nongton lantaran tingkat partisipasi manusa nu nongtonna leuwih hade. Cobi putuskeun naha bakal nagen nongton acara cerdas cermat nu pamilonna anak urang jeung kulawarga urang atawa nongton acara obrolan para ahli nu teu dikenal ku urang? Tangtuna leuwih milih keneh nongton acara nu ngalibatkeun anak atawa kulawarga lantaran ngarasa diri aya beungkeutan emosional.  Cenah mah kitu numutkeun kirata para ahlina. Hiji mangsa siaran televisi pribadi baris jadi bukti. Ngan perlu investor jeung pasti aya investorna nu nyadiakeun tempat kanggo nampung data televisi nu sakitu badagna, bisa trilyunan terabyte. Eta investor pasti modalna gede pisan. Ngan nu matak bingung, mun masing-masing manusa geus pada boga siaran televisi pribadi, saha nu nongtonna? Pek wae arilikan dina mangsana.

Dicaritakeun deui tina guaran Konsep Portal dan Manajemen Konten, Pa Solikin SSi, MT..